Simple Thoughts - خدوني على قد عقلاتي

ما بعرف شي


روي جورج حرب – موقع وارلد ستارز ماغ

من أجواء المهرجانات اللبنانية

يا ريت نحافظ على التراث
حلو نعيد أغاني الكبار ونولع المسرح فيها، بس الأحلى إذا منحافظ عليها

مثلاً إذا قررتو، يا حضرات النجوم، تتنازلو وتغنّو للصبوحة “تعلا وتتعمر يا دار”، وهي من احدى روائع الأغاني الوطنية اللبنانية، لازم تعرفو التالي

صباح غنت كلمات الفنان الكبير ايلي شويري اللي بتقول “ع الهوبار الهوبار” مش “ع الهوار” ولا “ع الدوار” والهوبَر بالمعجم معناتها الفهد وباللغة العامية “هوبرولو” يعني لوّحو بالنصر

وبتكمّل الصبوحة (يرحم ترابها) وبتقول “ومكللة بالغار” بمعنى النصر، مش مزينة يا دار

بالكوبليه الأخير بتقول “يا رجعة أهالينا صارت حلوة ليالينا” مش “صارت حلوة غنانينا”، لأن المفروض تكون الأغاني حلوة والليالي تصير أحلى بس يرجعو الحباب

هيدا نقطة ببحر التشويه اللي عم بيصير، والشعب المسكين بس يسمع نغمة وطنية بيحمل هالأعلام والشباب فوراً بترسم إشارات الأحزاب، والصبايا بتستعرض مفاتنها بالرقص الشرقي، وبتضيع الطاسة

الكلمة أساس الأغنية … ما في غنية بدون رسالة … انتبهو يا “نجومنا”، وإذا ما بتعرفو مش غلط تسألو … هني الفلاسفة قالو “ما منعرف شي”، مش رح تكونو أهم من أفلاطون وأرسطو

والسلام ختام

خدوني على قد عقلاتي

Load More

Leave a Comment