Simple Thoughts - خدوني على قد عقلاتي

كيف زاد عدد عجائب الدنيا السبعة؟

روي جورج حرب – موقع وارلد ستارز ماغ

بيقولو عجايب الدني سبعة

ايه بس لأ … تغيّرت وانزاد عليها عجايب بالدزينة شغل ايدينا وحياة عينينا

من عجايب مسلسلاتنا انو البطل بيتمرمغ بالتراب وبتضل قميصته بيضا متل الهفاف ومكوية كأنها طالعة جديد من المصبغة … مسلسلاتنا بتضارب ع مساحيق الغسيل وبيزيل المخرج كل البقع والأوساخ

وشو بخبركم عن جيل الشعر … بيعمل البطل معركة، منقول باللغة العامية بياكل قتلة، بيصير وجهه مشطّب ومليان دم … والنزيف متل النهر، وبيضلو شعراتو ما بيرفـّو … ثابتين ع مواقفهم أكتر من رجال السياسة … جيل مسلاسلاتنا يدوم ويدوم ويدوم

وما رح نحكي عن القصص، هيدي اللي بتحب من أول نظرة وبتتشردق، واللي بتركّب مقالب، واللي مغرومة واللي مصدومة، واللي فرحانة واللي الهمّ عتلانة … طيب ما في شي جديد؟ شي تحدّي جديد، شي فكرة جديدة … حلو الحب والرومنسية، بس حلو كمان نحكي بواقعية … بتزبط قولكم شي يوم؟

وبتبقى العجيبة الكبيرة، اللي هزّت كل الأوساط اللبنانية، وين عم بيلاقو ناس لبنانيي يشتغلو خدم بالبيوت؟ أنا من هالفكرة مصدوم … بدّي بنت للبيت تفهم عليي وافهم عليها، وإذا قلها جيبيلي بريق المي تا اشرب ما تجيب المكنسة وتوقف متل عواميد الذوق مقابيلي … يا ريت العجايب بتتحقق!

وبما انو عم نحكي عن عجايب، يا ريت نرتاح من دبلجة الأصوات الشقيقة ونرجع نسمع الدبلجة بأصوات ممثليننا … هالشي بيكون مفيد للأذن وللإقتصاد كمان

خدوني على قد عقلاتي

Leave a Comment